药末好喤。”玉甫道：“俚个病，旧年冬里就该应请个先生来医治医治。我也搭俚说仔几转哚，俚定归勿肯吃药，教我也无法子。”秀姐道：“俚是～径实概脾气，生仔病末勿肯说出来，问俚总说是好点。请仔先生来教俚吃药，俚倒要匆快活哉。不过我来里想，故歇该个病勿比仔别样，俚再要匆肯吃药，二少爷，勿是我说俚，七八分要成功哉喤！”

    玉甫垂头无语。秀姐道：“耐去劝俚，也要勿说啥，单说是请个先生来，吃两贴药末好得快点。耐倘然老实说仔，俚心里一急，再要急出啥病来，倒加二勿好哉。二少爷，耐末也要勿急，就急杀也无么用。俚个病终究勿长远，吃仔两贴药还勿要紧喤。”

    玉甫攒眉道：“要紧是勿要紧，不过俚也要自家保重点末好。

    随便啥事体，推扳一点点，俚就匆快活。耐想，俚病陆里会好？”

    秀姐道：“二少爷，耐是蛮明白来浪。俚自家晓得保重点，也无拨该个病哉，才为仔勿快活了起个头唍。故末也要耐二少爷去说说俚，俚还好点。”

    玉甫点头无语。秀姐又说些别的，玉甫方兴辞，原回漱芳房来。漱芳问道：“无娒请耐去说啥？”玉甫道：“无啥，说屠明珠搭阿是烧路头。”漱芳道：“勿是该个闲话，无娒来浪说我唍。”玉甫道：“无娒为啥说耐？”漱芳道：“耐要勿来骗我，我也猜着个哉。”玉甫笑道：“耐猜着仔末，再要问我？”

    漱芳默然。

    浣芳拉了玉甫踅至床前，推他坐下；自己爬在玉甫身上，问：“无娒真个说啥？”玉甫道：“无娒说耐勿好。”浣芳道：“说我啥勿好？”玉甫道：“说耐勿听阿姐个闲话；阿姐为仔耐勿快活，生个病。”浣芳道：“再说啥？”玉甫道：“再说末，说耐阿姐也匆好。”浣芳道：“阿姐啥勿好嗄？”玉甫道：“阿姐末勿听无娒个闲话。听仔无娒，吃点鸦片烟，寻寻开心，陆里会生病嗄。”浣芳道：“耐瞎说！啥人教阿姐吃鸦片烟？吃仔鸦片烟加二勿好哉！”

    正说时，漱芳伸手要茶。玉甫忙取茶壶，凑在嘴边吸了两口，漱芳从容说道：“倪无娒是单养我一干仔。我有点勿适意仔，俚嘴里末勿说，心里是急杀来浪。我也巴勿得早点好仔末，让俚也快活点，陆里晓得一径病到仔故歇还勿好。我自家拿面镜子来照照，瘦得来是匆像啥人个哉！说是请先生吃药，真真吃好仔也无啥，我该个病陆里吃得好嗄！旧年生仔病下来，头一个先是无娒急得来要死，耐末也无拨一日舒舒齐齐。我再要请先生哉、吃药哉，吵得一家人才匆安逸。娘姨、大姐做生活还忙杀来浪，再要搭我煎药，俚哚生来勿好来说我，说起来终究是为我一干子，病末倒原勿好，阿是无啥意思？”玉甫道：“故是耐自家来里多心再有啥人来说耐？我说末，勿吃药也无啥，不过好起来慢性点；吃两贴药末早点好。耐说阿对？”漱芳道：“无娒定归要去请先生，故也只好依俚。倘然吃仔药原勿好，无娒加二要急杀哉。我想，我从小到故歇，无娒一径稀奇杀仔，随便要啥，俚总依我。我无拨一点点好处拨俚，倒害俚要急杀快，耐说我陆里对得住俚？”玉甫道：“耐无娒就为仔耐病，耐病好仔，俚也好哉，耐也无啥对勿住。”漱芳道：“我自家生个病，自家阿有啥勿觉着？该个病，死末勿见得就死，要俚好倒也难个哉。我是一径常恐无娒几个人听见仔要发极，一径勿曾说，故歇也只好说哉。耐末也白认得仔我一场：先起头说个儿花闲话，要勿去提起哉；要求该世里碰着仔，再补偿耐。我自家想，我也无啥豁勿开，就不过一个无娒苦恼点。

    无娒说末说苦恼，终究有个兄弟来里，耐再照应点俚，还算无啥，我就死仔也蛮放心。除脱仔无娒，就是俚。”说着，手指浣芳，“俚虽然勿是我亲生妹子，一径搭我蛮要好，赛过是亲生个一样。我死仔，倒是俚先要吃苦，我故歇别样事体才匆想，就是该个一桩事体要求耐。耐倘然勿忘记我，耐就听我一句闲话：依仔我，耐等我一死仔末，耐拿浣芳就讨仔转去，赛过是讨仔我。隔两日，俚要想着我阿姐个好处，也拨我一口羹饭吃吃，让我做仔鬼也好有个着落，故末我一生一世事体也总算是完全个裁。”

    漱芳只管唠叨，谁想浣芳站在一倍，先时还怔怔的听着，听到这里，不禁“哇”的一声竟哭出来，再收纳不住。玉甫忙上前去劝。浣芳一撒手，带哭跑去，直哭到李秀姐房里，叫声“无娒”，说：“阿姐勿好哉呀！”秀姐猛吃一吓，急问：“做啥？”浣芳说不出，把手指道：“无娒去看喤！”秀姐要去看时，玉甫也跑过来，连说：“无啥，无啥。”遂将漱芳说话略述几句，复埋冤浣芳性急。秀姐也埋冤道：“耐啥一点勿懂事！阿姐是生仔病了，说说罢哉，阿是真个勿好哉凰”。

    于是秀姐挈了浣芳的手，与玉甫偕至前边，并立在漱芳床前。见漱芳没甚不好，大家放心。秀姐乃呵呵笑道：“俚末阿晓得啥？听见耐说得苦恼末，就急杀哉。倒吓得我来要死！”

    漱芳见浣芳泪痕未干，微笑道：“耐要哭末，等我死仔多哭两声末哉，啥要紧得来！”秀姐道：“耐也要勿说哉喤。再说说，俚再要哭哉。”随望望妆台上

『加入书签，方便阅读』