冷台，故是跳得来好白相煞哉！”吴松桥道：“老老头倒高兴哚。”

    李鹤汀正色道：“我说倒也是俚本事。耐想喤，俚屋里未几花姨太太，外头末堂子里倌人，还有人家人，一榻括仔算起来，差勿多几百哚！”周少和道：“到底阿有几花现银子？”李鹤汀道：“啥人去搭俚算嗄，连搭俚自家也有点模糊哉。要做起生意来，故末叫热昏搭仔邪，几千万做去看，阿有啥陶成！”

    大家听了，摇头吐舌，赞叹一番，也就陆续散去。

    李鹤汀随意躺在榻床上，伸了个懒腰，打了个呵欠。杨媛媛问：“阿要吃筒鸦片烟？”鹤汀说：“要勿吃。昨日闹仔一夜天，今朝勿曾因醒，懒朴得势。”媛媛道：“昨日去输仔几花嗄？”鹤汀道：“昨日还算好，连配仔两条就停哉，价末也输千把哚。”媛媛道：“我劝耐少赌赌末哉。难为仔洋钱，还要糟塌身体。耐要想翻本，我想俚哚人赢末倒拿仔进去哉，输仔勿见得再拿出来拨来耐哉喤。”鹤汀笑道：“故是耐瞎说。先拿洋钱去买得来筹码，有筹码末总有洋钱来除，阿有啥拿匆出？

    就怕翻本翻勿转，庄浪风头转仔点，俚哚倒勿打哉，赢勿动俚，无法仔！”媛媛道：“原是唍。我说耐明朝要到尤如意搭去，算好仔几花输赢，索性再赌一场，翻得转末翻仔，翻勿转就气输仔罢哉。”鹤汀道：“故末勿差。倘然翻勿转，我定规要戒赌哉。”媛媛道：“耐能够戒脱仔勿赌，故是再好也匆有。

    就是要赌末，耐自家也留心点，像实概几万输下去，耐末倒也无啥要紧，别人听见仔阿要发极嗄？耐哚四老爷要问起倪来为啥勿劝劝喤，倪倒吃仔俚闲话，也只好勿响唍。”鹤汀道：“故是无价事个，四老爷勿说我倒来说耐？”媛媛道：“故歇说闲话个人多，例说勿定唍。其实倪搭是耐自家高兴赌仔两场，闲人说起来，倒好像倪挑仔几花头钱哉。倪堂子里勿是开啥赌场，也要勿挑啥头钱唍。”鹤汀道：“啥人来说耐嗄，耐自家来哚多心。”媛媛道：“难耐到尤如意搭去赌末哉；故末有啥闲话，也匆关倪事。”

    说话时，鹤汀已自目饧吻沥，微笑不言，媛媛也就剪住了。

    当下鹤汀朦胧上来，竟自睡去。媛媛知他欠困，并不声唤，亲自取一条绒毯替他悄地盖上。鹤汀直睡至上灯以后，娘姨盛姐搬夜饭进房，鹤汀听得碗响即又惊醒。杨媛媛问鹤汀道：“耐阿要先吃仔口，再去吃酒？”鹤汀一想，说道：“吃是倒吃勿落，点点也无啥。”盛姐道：“无拨啥小菜唍，我去教俚哚添两样。”鹤汀摇手道：“要勿去添，耐搭我盛一口口干饭好哉。”

    媛媛道：“俚乃喜欢糟蛋，耐去开仔个糟蛋罢。”盛姐答应，立刻齐备。

    鹤汀和媛媛同桌吃毕，恰值管家匡二从客栈里来，见鹤汀禀说：“四老爷吃酒去哉，教大少爷也早点去。”媛媛道：“等俚哚请客票头来仔了去，正好唍。”鹤汀道：“早点去吃仔，早点转去困觉哉。”媛媛道：“耐身向里有点勿舒齐末，原到倪搭来，比仔栈房里也适意点哚。”鹤汀道：“两日勿曾转去，四老爷好像有点勿放心转去个好。”媛媛也无别语。李鹤汀乃叫匡二跟着，从杨媛媛家出门赴席。

    第十四回终。

『加入书签，方便阅读』