按：黄翠凤的妹子金凤见留不住罗子富、汤啸庵两位，即去爬在楼窗口，高声叫：“无娒，罗老爷去哉！”那老鸨黄二姐在小房间内听了，急跑出来，恰好在楼梯下撞着，一把抓住罗子富袖子，说：“勿许去！”子富连道：“我无拨工夫来里。”黄二姐大声道：“耐要去末，等倪翠凤转来仔了去。”

    又嗔着汤啸庵道：“耐汤老爷倒也要紧哚唍，啥勿搭倪罗老爷坐一歇，说说闲话嗄。”

    于是，不由分说，拉了罗子富上楼；叫小阿宝拉了汤啸庵，重到房间里来。黄二姐道：“宽宽马褂，多坐歇。”说着，伸手替罗子富解钮扣。金凤见了，也请汤啸庵宽衣。小阿宝摄了茶叶，随向啸庵手中接过马褂。黄二姐将子富脱下的马褂也授与小阿宝，都去挂在衣架上。

    黄二姐一回头，见珠凤站在一傍，嗔他不来应酬，瞪目直视。吓得珠凤倒退下去，慌取了一支水烟筒，装与子富吸。子富摇手道：“耐去搭汤老爷装罢。”黄二姐问子富道：“阿是多吃仔酒哉？榻床浪去軃軃喤。”子富随意向烟榻躺下。小阿宝绞了手巾，移过一只茶碗，放在烟盘里，又请啸庵用茶。啸庵坐在靠壁高椅上，傍边珠凤给他装水烟。黄二姐叫金凤也取一支水烟筒来，遂在榻床前机子上坐了，自吸一口，却侧转头悄悄的笑向子富道：“耐阿是动气哉？”子富道：“动啥气嗄？”黄二姐道：“价末为啥好几日勿请过来？”子富道：“我无拨工夫唍。”黄二姐鼻子里“哼”的一声，半晌，笑道：“说也匆差，成日成夜来哚老相好搭，阿有啥工夫到倪搭来嗄！”子富含笑不答。

    黄二姐又吸了一口水烟，慢慢说道：“倪翠凤脾气是匆大好，也怪勿得耐罗老爷要动气。其实倪翠凤脾气末有点，也看客人起，俚来里罗老爷面浪，倒勿曾发过歇一点点脾气喤。汤老爷末也晓得点俚哉。俚做仔一户客人，要客人有长性，可以一直做下去，故末俚搭客人要好哚。俚搭客人要好仔，陆里有啥脾气嗄？俚就碰着仔无长性客人，难末要闹脾气哉。俚闹起脾气来，要勿说啥勿肯巴结，索性理也勿来理耐唍。汤老爷阿是？第歇耐罗老爷末好像倪翠凤勿巴结了动气，陆里晓得倪翠凤心里搭罗老爷倒原蛮要好，倒是耐罗老爷勿是定归要去做俚，俚末也勿好来陪巴结耐哉唍。俚也晓得蒋月琴搭罗老爷做仔四五年哉，俚有辰光搭我说起，说：‘罗老爷倒有长性哚，蒋月琴搭做四五年末，来里倪搭做起来阿会推扳嗄？’我说：‘耐晓得罗老爷有长性末，为啥勿巴结点喤？’俚也说得勿差，俚说：‘罗老爷有仔老相好，只怕倪巴结匆上，倒落仔蒋月琴哚笑眼里。’俚是实概意思。要说是俚勿肯巴结耐罗老爷，倒冤枉仔俚哉。我说罗老爷，耐故歇坎坎做起，耐也匆曾晓得倪翠凤个脾气，耐做一节下来，耐就有数目哉。倪翠凤末也晓得耐罗老爷心里是要做俚，难末俚慢慢仔也巴结起来哚。”

    子富听了，冷笑两声。黄二姐也笑道：“阿是耐有点勿相信我闲话？耐问声汤老爷看，汤老爷蛮明白哚。汤老爷，耐想喤，倘然俚搭罗老爷勿要好末，罗老爷陆里叫得到十几个局嗄？

    俚心里来哚要好，嘴里终勿肯说出来，连搭娘姨、大姐哚才匆晓得俚心里个事体，单有我末稍微摸着仔点。倘然我故歇放罗老爷去仔，晚歇俚转来就要埋冤我哉唍。我老实搭罗老爷说仔罢：俚做大生意下来，也有五年光景哉，通共就做仔三户客人，一户末来里上海，还有两户，一年上海不过来两埭，清爽是清爽得野哚。我再要俚自家看中仔一户客人，搭我多做点生意，故是难杀哚喤。推扳点客人要勿去说哉，就算客人末蛮好，俚说是无长性，只好拉倒，教我阿有啥法子嗄？为此我看见俚搭罗老爷蛮要好末，望罗老爷一直做下去，我也好多做点生意。

    勿然是老实说，像罗老爷个客人到倪搭来也勿少唍，走出走进，让俚哚去，我阿曾去应酬歇？为啥单是耐罗老爷末要我来陪陪耐嗄？”

    子富仍是默然，汤啸庵也微微含笑。黄二姐又道：“罗老爷做末做仔半个月，待倪翠凤也总算无啥，不过倪翠凤看仔好像罗老爷有老相好来哚，倪搭是垫空个意思。我倒搭俚说：‘耐也巴结点，有啥老相好、新相好，罗老爷阿会待差仔倪嗄？’俚说：‘隔两日再看末哉。’前日仔俚出局转来，倒搭我说道：‘无娒，耐说罗老爷搭倪好，罗老爷到仔蒋月琴搭吃酒去哉。’我说：‘多吃台把酒是也算勿得啥。’陆里晓得倪翠凤就多心哉喤，说：‘罗老爷原搭老相好要好末，阿肯搭倪要好嗄？’”

    子富听到这里，不等说完，接嘴道：“故是容易得势，就摆起来吃一台末哉唍。”黄二姐正色道：“罗老爷耐做倪翠凤，倒也匆在乎吃酒勿吃酒。要勿为仔我一句闲话吃仔酒了，晚歇翠凤原不过实概，例说我骗耐。耐要做倪翠凤末，耐定归要单做倪翠凤一个哚，包耐十二分巴结，无拨一点点推扳。要勿做做倪翠凤，再去做做蒋月琴，做得两头勿讨好。耐勿相信我闲话，耐就试试看，看俚那价功架，阿巴结勿巴结。”子富笑道：“故也容易得势，蒋月琴搭就匆去仔末是哉唍。”黄二姐低头含笑，又吸了一口水烟，方说道：“罗老爷，耐倒也会说笑话哚！四五年

『加入书签，方便阅读』